غدر انسان

لو جرحك فى يوم غدر انسان

اوعى تبكي..اعتبره فى طي النسيان

اعتبره ساعتها كأنه اصلا ما كان

ولا تصعب عليك نفسك..ده انت الكسبان

ده الندل هيعيش و يموت خسران

و يمكن يستحق الشفقة لأنه غلبان

غلبان عشان مفهمش ان كما تدين تدان

مهو ربنا قادر و منتقم و رحمن

واللى يغدر بغيره ويخون ده لنفسه خان

ده ربك شايف نواياك يا غفلان

واخيرا تعازي للانسان اللى مش انسان

ملناش مكان فيكى

ملناش يا دنيا مكان فيكى

افتكرت يوم ان فرحى يحييكى

وان دمعة عينيا تحرق فيكى

بس اكتشفت ان فرحى يبكيكى

وان حزنى ينور لياليكى

عشان كده بقول دلوقتى ليكى

ملناش يا دنيا مكان فيكى

ملناش نصيب فى فرحك

ملناش نصيب فى سعدك

كل اللى نابنا يا دنيا جرحك

بقى للدرجادى مضيقين ارضك؟

ياااااه طلع مر قوى ملحك

وسكرك مش لينا ولا ضحكك

خلاص بعترف ملناش مكان فى ارضك

الزمن

ليه يا زمن؟

تئن الاغصان من نزول المطر

تنوح الطيور من شوفة القمر

قولت ظاهرهم خير باطنهم هلاك للبشر

مهى مش دايما المطر خير

ساعات السما تمطر حجر

ولا شوفة القمر بليل

يعنى شموع وحب وسمر

ده ساعات يكون علامة ضجر

علامة ليل طويل مليان سهر

وصوت ديابة ورياح وخوف

تشم ريحته من بين الشجر

اوعى يا بنى آدم يغرك الظاهر

ده كتير يبان ملاك طاهر

لكن يطلع ثعبان سمه قاهر

خد بالك يا بنى الانسان من كل غادر

خدبالك من طير مسافر

او ضوء نهار مهاجر

لأنه يا من الخوف مغادر

يا من الظلم سايبها وغاير

لمعة عينيها

شاف فى عينيها لمعة

قال دى غير البشر

قرب لقاها دمعة

قلبه ليها انكسر

كان فاكر لمعة عينيها

ان الفرح والحسن ماليها

لكن للاسف لقا الحزن فيها

حزن مخبى عينيها ومخبيها

حزن مانع الفرح يداويها

حزن جاب دمعة ؛باديها تداريها

عنده حق يتحير ويستعجب عليها

مهى لمعة عينيها القمر ما يساويها

يعنى لو الدمعة تبقى فرحة تنور بين جفونها

عمر ضلمة الدنيا فى يوم ما تطولها

مهى لمعة الفرحة اتخلقت لاجل عيونها

الست فرحة2
يا ست فرحة قوليلى امتى هتنورينا
شوفى عايزة ايه ونديهولك من عنينا
المهم تيجى بيتنا من بدرى تشرفينا
بس وانتى جاية ادى ميسد لحزن افندى متينة
يسبقك على اى حتة لحسن فاض بينا
دالبعيد بقاله كام يوم عندنا رذينا
مش قادر يفهم انه كده تقل علينا
بينك وبينه فهميه انه يهوينا
لحسن يطلع استاذ غضب بكره لينا
يجي يقعد مع حزن افندى وتبقى فخفخينا
يا ست فرحة حذريهم انك جاية تزورينا
ولو تجيبى بنتك ضحكة تبقى والله فرحتينا
اهو نبقى عزوة ونفضل للصبح تسلينا
والله دى هتبقى ليلة ولا كأننا فى مارينا
ماهى الست فرحة جت ولا حاجة فارقة فينا
قومى يا ست فرحة هزيها بقى وفرجينا

الست فرحة
ربنا ما يكتب علينا الزعل تانى!!
جملة قالها ابويا فرحتنى آخر حاجة
بس وقفت بتاع ساعة مش فاهمة حاجة
ربنا ما يكتب علينا الزعل تانى!!
طب مش ندعى تنكتب علينا الفرحة اولانى
رديت عليا بس ميجيش الزعل والفرحة تيجى على مهلها
ولو مجتش نقوم كمان نندهلها
ننده بأعلى صوتنا ولو مرديتش نجيبها من شعرها
وده كلام؟هى الفرحة تبقى فرحة غير لما تيجى برجلها
ماهى مش خناقة ولا عافيى دى حاجة بتيجى لوحدها
تلاقيها تجرى على صاحب النصيب ترسمله ضحكة بنفسها
مش شرط غنى ولا فقير مفيش تفريق عندها
بس ساعة ما تيجى صاحب النصيب لازم قوام يخضعلها
رديت وقلت طب يا ست فرحة تعالي..وانا فى ثوانى هقوملها
اقطف من جناين الدنيا وردة واجرى عليها واقدملها
بس يا شيخة امانه عليكى قوليلها تدق بابنا وانا هفتحلها
ولو معجبنهاش تبقى تاخد بعضها وتجرى وانا برضه هفتحلها
ماهى تشكر برضه على مجيتها حتى لو ملحقناش نحسها
يعنى الست تكلف خاطرها واحنا نيجى نتنحلها
دانتو عيال رذلة قوى فاكرين وقتها ملكها
دى ياعبط الست فرحة هانم...قوم يلا وسعلها
امانة عليكى تقوليلها تيجى بيتنا وانا الباب هسيبلها
عشان متقولش هنحبسها او طمعانين فى ضحكها
تيجي وقت وا تيجي وتمشى وقت ما يروقلها
المهم تيجى مرة عشان احلف اقول والله مرة شفتها

welcome to my blog